शीर्ष नेतातय् विदेश भ्रमणय् सभामुखया आपत्ति
येँ (सन्ध्या टाइम्स)/देशय् राजनीतिक गतिरोध जुयाच्वंगु अवस्थाय् एमालेया शीर्ष नेतात थीथी देशया भ्रमणय् वनेत्यंगु खँयात कयाः व्यवस्थापिका संसदया सभामुख सुवासचन्द्र नेम्वाङं आपत्ति प्वंकादीगु दु ।
संविधान निर्माण, शान्ति प्रक्रिया, प्रधानमन्त्री निर्वाचन, संसद अधिवेशन नापं मेमेगु खँय् सहमति ब्वलंकेमाःगु इलय् प्रधानमन्त्री लगायत एमालेया स्वम्हं हे शीर्ष नेतात विदेश भ्रमणय् वनेत्यंगुलिं अझ अप्वः अन्यौलता ब्वलन धकाः सभामुख नेम्वाङं आपत्ति प्वंकादीगु खः ।
वय्कलं थौं संचार माध्यमतलिसे खँल्हासें थ्व खँ धयादीगु खः। प्रधानमन्त्री माधव नेपाल नापं शीर्ष नेतात अध्यक्ष झलनाथ खनाल, वरिष्ठ नेता केपी शर्मा ओली नं विदेश भ्रमणय् वनेत्यंगु दु। थुकिं यानाः व्यवस्थापिका संसदया अधिवेशन छु यायेगु धइगु सवालय् झन हे अन्यौलता ब्वलनीगु जूगु दु। अध्यक्ष खनाल बुधवाः दक्षिण अफ्रिका वनीगु जूगु दुसा प्रधानमन्त्री नेपाल व स्थायी समितिया दुजः केपी ओली कन्हय् हे कम्बोडियाय वनीगु जूगु दु। वय्कःपिं निम्हं एसियाली राजनीतिक दलतय्गु संगठन (आईक्याप)या १४ क्वःगु सम्मेलनय् ब्वति कायेत उखे वनेत्यंगु खः ।
