उपसभापतिइ पौडेल व महामन्त्रीइ सिटौलाया नां प्रस्ताव
नेपाली कांग्रेसया सभापति सुशील कोइरालां केन्द्रीय समितिया मुँज्याय् उपसभापतिइ रामचन्द्र पौडेल व महामन्त्रीइ कृष्णप्रसाद सिटौलाया नां प्रस्ताव यानादीगु दु ।
कांग्रेसया झिंनिक्वःगु महाधिवेशन लिपाः थौं कांग्रेसया मू ज्याकू सानेपाय् च्वंगु निक्वःगु केन्द्रीय समितिया मुँज्याय् सभापति कोइरालां निगू पदया निंतिं मनोयनय् पौडेल व सिटौलया नां प्रस्ताव यायेवं विवाद ब्वलंगु दु ।
मुँज्याय् कांग्रेस नेतृ नापं उपप्रधानमन्त्री सुजाता कोइराला लगायतं सभापतिया प्रस्तावय् आपत्ति प्वंकूगु खः । अथेहे महाधिवेशनया सभापति पदय् बुम्ह शेरबहादुर देउवा पक्षया नेतातय्सं निम्हं नेतातय्सं समानजनक मत हःगु धासें मेगू पक्षयात बेवास्ता यानाः सभापतिं विधान विपरित पदाधिकारी मनोयनया प्रस्ताव याःगु द्वपं ब्यूगु दु ।
कांग्रेस विधान कथं महधिवेशन जूगु निलाःया दुने पदाधिकारीत मनोनयन यायेमाःगु व्यवस्था दु । थ्वस्वयां न्ह्यः सभापति कोइरालां शेरबहादुर देउवयात केन्द्रीय दुजःलय् मनोनयन यानादीधुंकल । केन्द्रीय समितिया मुँज्या हानं कन्हय् १ बजे च्वनीगु जूगु दु ।
