सहमति यानाः जक गतिरोध क्वच्याकेगु : प्रधानमन्त्री

प्रधानमन्त्री पुष्पकमल दाहाल प्रचण्डं सेनापति प्रकरण लिपाः उत्पन्न गतिरोध सहमतिया आधारय् हे अन्त्य यायेगु प्रतिबद्धता प्वंकादीगु दु ।

बिहिवाः सुथय् प्रधानामन्त्री निवास बालुवाटार थ्यंकूगु नागरिक समाजया अगुवातनाप नापलायेगु झ्वलय् वयेकलं थंज्याःगु प्रतिबद्धता प्वंकादीगु खः । नागरिक समाजया अगुवातय्सं सेनापति प्रकरणयात सहमतिया आधारय् याकनं क्वचायेकेत प्रधानमन्त्रीयात इनाप याःगु खः ।

नागरिक सर्वोच्चतायात केन्द्रय्तया निर्णय कायेत नागरिक अगुवातय्सं प्रधानमन्त्रीयात सुझाव ब्यूगु खँ प्रधानमन्त्रीया प्रस सल्हाकार ओम शर्मां जानकारी बियादिल । वय्कपिंसं दलत दथुइया गतिरोध अप्वया वंसाः ईलय् हे संविधान निर्माण मजुइगुलि आशंका प्वंकादिल । लिसलय् प्रधानमन्त्रीं सहमतिया आधारय् ईलय् हे संविधान निर्माण ज्या पूवनी धयादिल ।