समाधान मजूगु विषय केन्द्रीय मुँज्याय् सहलह याइगु
एकीकृत नेकपा (माओवादी)या खुक्वःगु विस्तारीत मुँज्या ज्यंकेमफुगु विषयत केन्द्रीय समितिया मुँज्याय् सहलह यानाः निर्णय यायेगु सहमति सहति क्वचाःगु दु ।
न्हय्न्हु न्ह्यः निसें गोरखाया पालुङटारय् न्ह्यानाच्वंगु मुँज्याया लिप्पांगु न्हि शनिवाः छगू पत्रकार सम्मेलन यानाः विस्तारित मुँज्याय् जूगु निर्णयया बारे जानकारी ब्यूगु खः । पत्रकार सम्मेलनय् नायः पुष्पकमल दाहाल 'प्रचण्डं' विस्तारित मुँज्यां पार्टीया छगू हे दस्तावेज वःगु धासें छुं छुं विषयत ज्यंके ल्यँ दनीगु व उकीया बारे केन्द्रीय समितिलय् सहलह जुइगु धयादिल ।
पत्रकारतय् न्ह्यसःलय् विस्तारीत मुँज्याय् बिस्कं बिस्कं प्रतिवेदन न्ह्यब्वःपिं न्वकूत मोहन वैद्य 'किरण' व डा. बाबुराम भट्टराईं स्वंगूलिं नेतातय् फरक मत दनीसां दस्तावेज धाःसा छगू हे जूगु जानकारी ब्यूगु खः ।
थ्वस्वयां न्ह्यः विस्तारित मुँज्याय् माओवादी नायः प्रचण्ड व निम्ह न्वकूत किरण व भट्टराईं थःथःगु प्रतिवेदन न्ह्यब्वःगु खःसा उकी राज्य समिति, जनवर्गीय संगठन, लडाकु कमाण्डर सहितं थःथःगु बिचाः प्वंकूगु खः ।
मुँज्यां शान्ति व संविधान निर्माणय् बः ब्यूसें थुकी पंग थनेगु ज्या जुसाः जनतायात सतकय् क्वकाया विद्रोह यायेगु कार्यदिशा पारित याःगु दु ।
