कांग्रेसया सुं नं सत्रु मदु : कोइराला
नेपाली कांग्रेसया सभापति सुशील कोइरालां नेपाली कांग्रेसया सुं नं सत्रु मदुगु खँ धयादीगु दु ।
एनेकपा (माओवादी)या विस्तारित मुँज्याय् माओवादी नेतात थःगु प्रमुख सत्रु किटान यायेत लगे जुयाचवंगु इलय् थौं येँय् जूगु छगू ज्याझ्वलय् सभापति कोइरालां माओवादीपाखे लक्षित् यासें नेपाली कांग्रेसया छुं नं वर्ग सत्रु मजुगु स्पष्ट यानादिल ।
कांग्रेसया येँय् निर्वाचन क्षेत्र नं ५पाखें थौं याःगु छगू ज्याझ्वलय् वय्कलं माओवादी व मेमेगू दलत दथुइ खनेदुगु समस्या वार्ता, सहमति व सहकार्यपाखें समाधान यायेमाःगु धयादिल । शान्ति व संविधान निर्माण कांग्रेसया मू प्राथमिकता जूगु धासें सभापति कोइरालां कांग्रेसया नेतृत्वय् शान्ति प्रक्रिया व संविधान निर्माण जुइगु दावी यानादिल ।
ज्याझ्वलय् कांग्रेस महामन्त्री प्रकाशमान सिंहं कांग्रेसं न्ह्याःगु नं मुल्य पुलाः जुसां शान्ति व संविधान निर्माण यानाः हे त्वःतिगु दावी यानादिल । वय्कलं कांग्रेसया नेतृत्वय् जक शान्ति प्रक्रिया व संविधान निर्माण पूवनीगु नं धयादिल ।
