सहलह यानाः संसदया अधिवेशन : प्रधानमन्त्री

प्रधानमन्त्री माधवकुमार नेपाल दलत दथुइ सहलह यानाः व्यवस्थापिका संसदया अधिवेशन सतिगु धयादीगु दु ।

एमालेया येँय् जिल्ला कमिटिं नेपाल संवत् ११३१या लसताय् थौं याःगु तुच्चा ज्याझ्वलय् प्रधानमन्त्री नेपालं माओवादी विस्तारित मुँज्या लिपा येँय् वयेधुंकाः फुक्क दलत नाप सहलह यानाः मेगू अधिवेशन सतिगु धयादिल ।

येँया बसन्तपुली जूगु याझ्वलय् एमाले नायः झलनाथ खनालं सहमति, सहकार्य व दलतय् एकताया विकल्प मदुगु धयादिल । वय्कलं पार्टी दुने छुं नं कथंया मतभेद मदुगु दावी यानादिल । प्रधानमन्त्री नेपाल व पार्टीया वरिष्ठ नेता केपी शर्मा ओलीया उपस्थिति दुगु ज्याझ्वलय् नायः खनालं अज्याःगु दावी यानादीगु खः ।