'माओवादीं शान्ति प्रक्रिया भंग यायेधुंकल'
राक्षामन्त्री विद्यादेवी भण्डारीं माओवादीं शान्ति भंग प्रक्रिया भंग यायेधुंकूगु द्वपं बियादीगु दु ।
विराटनगर विमानस्थलय् थौं पत्रकारतनाप खँल्हाबंला यानादिसें वय्कलं माओवादीं शान्ति प्रक्रिया भंग यायेधुंकूगु तर घोषणा याये जक ल्यँ दनीगु दावी यानादिल । माओवादीं यक्वः सम्झौता कार्यान्वयन मयागु धासें मन्त्री भण्डारीं सरकार नं सम्झौता कार्यान्वयनया निंतिं वाध्य मजुइगु धयादिल ।
राक्षामन्त्रीं भण्डारीं लडाकुतय्सं माओवादीया विस्तारित मुँज्याय् ब्वति काःगुलिं समायोजनया औचित्य क्वचाःगु धयादिल । सरकारया रेखदेख व तलबभत्ता कयाः च्वंगु लडाकुत राजनीतिक गतिविधिलय् संलग्न जूगु धासें भण्डारीं लडाकु समायोजनया आः छुं नं औचित्य मदुगु टिप्पणी यानादिल ।
माओवादीं मेपिंत विदेशी दलाल धयाच्वंसां दलकय् तःधंगु दलाल माओवादी हे जूगु टिप्पणी नं वय्कलं यानादिल ।
