'माओवादी विरुद्ध मंकाः मोर्चा'

येँ (सन्ध्या टाइम्स)/राजतन्त्रवादी व मधेशवादी दलत एकीकृत माओवादी विरुद्ध लोकतान्त्रिक मोर्चाबन्दी यायेगु खँय् सहमत जूगु दु। पुलांम्ह प्रधानमन्त्री एवं राष्ट्रिय जनशक्ति पार्टीया अध्यक्ष सूर्यबहादुर थापाया मालिगाउँया छेँय् वंगु चान्हय् भ्वय् नयेगु झ्वलय् अज्याःगु मोर्चा दयेकेगु सहमति जूगु खः। चान्हय् तसकं लिबाक्क तक जूगु उगु भ्वजय् लोकतान्त्रिक मोर्चाबन्दी मदयाः माओवादीयात फाइदा जूगु तकं निष्कर्ष पिकाःगु दु। उगु भ्वजय् मधेशी जनअधिकार फोरम लोकतान्त्रिक, तराई मधेश लोकतान्त्रिक पार्टी व नेपाल सद्भावना पार्टीया शीर्ष नेतात दुथ्याःगु खः। राजतन्त्रवादी कथं म्हसिउम्ह जनशक्ति पार्टीया अध्यक्ष थापां लोकतान्त्रिक शक्तितय्गु एकता यानाः प्याकेजय् सहमति जुइ धुंकाः जक संसद सःतकेगु प्रस्ताव तयादीगु खः ।