चिकित्सालययात पदयात्रीया ग्वाहालि
येँ (सन्ध्या टाइम्स)/येँया १७ वडास्थित छत्रपाटीइ च्वंगु छत्रपाटी निःशुल्क चिकित्सालयय् शल्यक्रियाया ज्या नं शुरु यायेत ग्वाहालि कथं क्यानाडाया निम्हतिपू भाजु वाली रावले व मय्जु वेभ हुग्श रावलें १७ लाख ६७ हजार ५०० तका दां लःल्हानादीगु दु ।
वंगु निवाः न्ह्यः छगू चीधंगु ज्याझ्वःया दथुइ चिकित्सालयया अध्यक्ष विजय बहादुर मालीयात उगु दांया चेक लःल्हानादीगु खः। वय्कःपिंसं चिकित्सालययात ग्वाहालि याये दयाः लय्तायागु खँ कँसें भविष्यय् याकनं हे अन्तरंग सेवा शुरु जुइगु आशा प्वंकादिल। नेपालय् स्वक्वःगु खुसी पदयात्राय् वःपिं क्यानाडाया ६५ म्हेसिया पुचःयाके चन्दा कयाः मुंगु थ्व दां वय्कःपिंसं चिकित्सालययात लःल्हानादीगु खः ।
थुगु चिकित्सालयं गरीब, असहाय मनूतय्त निःशुल्क स्वास्थ्य सेवा बिया वयाच्वंगु दु ।
