द्वन्द्वय् लाःपिं मस्तय् पुनस्थापना जुइगुलि राष्ट्रसंघया विश्वास
राष्ट्रसंघया बालबालिका व सशस्त्र द्वन्द्व सम्बन्धी सुरक्षा परिष्दया कार्यपुचलं नेपाःया सशस्त्र द्वन्द्वया ईलय् छ्यःपिं व मारय् लाःपिं मस्तय् पुनस्थापना जुइगु विश्वास प्वंकूगु दु ।
न्हय्न्हुयंकया नेपाः भ्रमण क्वचायेकाः लिहांवने न्ह्यः थौं येँय् याःगु पत्रकार सम्मेलनय् कार्यपुचःया नायः क्लाउड हेलरं नेपाः सरकार, माओवादी व सरोकारवाला पक्षत च्वनाः मस्तय् पुनस्थापना बारे ठोस कार्ययोजना कथं ज्या याइगु विश्वास प्वंकादिल ।
द्वन्द्वया इलय् मस्तय्त छ्यःगु व भर्ती यायेगु पाखें नेपाःया नां लिकायेगु बारे राष्ट्रसंघया ध्यानाकर्षण याकेगु धासें हेलरं तर थुकीया बारे सम्बद्ध पक्षतय्सं ल्हाःचिं तयातःगु कार्ययोजनाया पूर्ण पालना जू व मजूगुलि निर्भर जुइगु धयादिल ।
थौं हे उगु पुचलं प्रधानमन्त्री माधवकुमार नेपालयात नापलानाः द्वन्द्वया इलय् छ्यःपिं मस्तय्त याकनं पुनस्थापना यायेत इनाप याःगु खः । प्रधानमन्त्री नेपालं सरकार थुगु विषयलय् गम्भीर जूगु धासें पुनस्थापना सम्बन्धी कार्ययोजना लागू यायेगुलि प्रतिबद्धता प्वंकादिल ।
थ्वस्वयां न्ह्यः उगु पुचलं माओवादी नायः पुष्पकमल दाहाल 'प्रचण्ड' लगायतया नेतातनाप नं खँल्हाबंला याःगु खः ।
