'सर्वोच्चया आदेश पूर्वाग्रही'
सर्वोच्च अदालतं फोटो सहितया राष्ट्रिय मतदाता परिचयपत्र दयेकेगु आधार कथं नागरिकतायात जक कायेत ब्यूगु अन्तरिम आदेशयात मधेशवादी दलतय्सं पूर्वाग्रही जूगु द्वपं ब्यूगु दु । इमिसं सर्वोच्चया निर्णय मधेशी जनताया हितय् मदुगु धासें उकीया विरुद्ध आन्दोलन यायेगु ख्याच्वः ब्यूगु दु ।
रिपोटर्स क्लबं थौं येँय् याःगु साक्षात्कार ज्याझ्वलय् सद्भावना पार्टीया नायः नापं आपूत्ति मन्त्री राजेन्द्र महतों नागरिकता बिनाया नेपाःमितय् मतदाता परिचयपत्र दयेके मज्यूगु धकाः नेपाःया संविधान व कानुनय् च्वयामतःगु धयादिल ।
अथेहे तराई मधेश लोकतान्त्रिक पार्टीया महामन्त्री नापं उद्योग मन्त्री महेन्द्र यादव व मधेसी जनअधिकार फोरम लोकतान्त्रिकया न्वकू रामेश्वर राय यादवं सर्वोच्च अदालतं पूर्वाग्रही रुपं निर्णय याःगु धासें उकीया विरुद्ध आन्दोलन यायेगु ख्याच्वः ब्यूगु दु ।
उखे सर्लाहीलय् पत्रकारत नाप खँल्हाबंला यानादिसें मधेसी जनअधिकार फोरम नेपालया नायः उपेन्द्र यादवं मतदाता परिचयपत्र सम्बन्धी निर्णय यानाः सर्वोच्चं राजनीतिक क्षेत्रय् हस्तक्षेप याःगु द्वपं बियादिल ।
वय्कलं मतदाता धाइगु विषय राजनीतिक विषय जूगुलिं उकी सर्वोच्चं हस्तेक्षप यायेमज्यूगु धयादिल । यादवं नेपाली नागरिकतय्त मतदान यायेगु अधिकार पाखें वञ्चित यायेगु निर्णययात फोरमं स्वीकार मयायेगु धयादिल ।
