स्वंगू प्रमुख दलया बैठक बिना निष्कर्ष क्वचाल
सरकारं प्रधानसेनापति याके काःगु स्पष्टिकरण व कारवाही प्रकृया बारे सहलह यायेत च्वंगु स्वंगू प्रमुख दलया थौंया बैठक नं बिना निष्कर्ष क्वचाःगु दु ।
प्रमुख स्वंगू दलत एकीकृत नेकपा (माओवादी), प्रमुख प्रतिपक्षी नेपाली कांग्रेस व एमालेया नेतात्य्सं थःथगु हे अडानय् कायम यागुलिं बैठकं छुं निष्कर्ष पिकाये मफुगु खः । तर थौंया बैठकं छुं निष्कर्ष पिकाये मफुसां स्वंगू दलया शिर्षस्थ नेतातय् बैठक हाकनं च्वनेगु सहमति जूगु खँ एमाले महासचिव ईश्वर पोखरेलं जानकारी बियादिल ।स्वंगुलिं दलं सिंहदरवारय् च्वंगु थःथःगु सचिवालय् बैठक च्वनाः लिपाः हाकनं स्वंगू दलया मंकाः बैठक च्वनेगु सहमति जूगु दु ।
बैठक लिपा संचारकर्मीतनाप खँल्हानादिसें माओवादी नेता मोहन वैद्य किरणं आः जुइगु स्वंगू दलया बैठकय् प्रधानसेनापतिया प्रकरण नापं देशय् जुयाच्वंगु थीथी विषयलय् नं सहलह जुइगु खँ कनादिल ।
थौंया बैठकय् माओवादीं प्रधानसेनापतियात कारवाही यायेमाःगु अडान काःगु खसाः एमालें छत्रमान गुरुङ्गयात प्रधानसेनापति देयेकेमाःगु प्रस्ताव न्ह्यने हःगु खः । अथेहे कांग्रेसं धासाः माओवादीं सेनापतियात कारवाही सेनाया मनोवल कमजोर यायेत स्वःगु नापं देया दक्वं प्रमुख अंगय् हस्तक्षेप याःगु द्वपं ब्यूगु खः ।
मेगू बैठक च्वनेस्वयां न्ह्यः एमालें नेपाली कांग्रेसया सभापति गिरिजाप्रसाद कोइराला नापलयेगु ग्वसाः ग्वःयातःगु दुसाः थौं च्वंगु स्वंगु दलया बैठक बारे जानकारी बीत कांग्रेस नेतात नं कोइराला निवस महाराजगंज थ्यंकूगु दु ।
