शान्ति प्रकृयाय् सचेत जुइत राष्ट्रसंघ महासचिवया इनाप
राष्ट्रसंघया महासचिव वान की मुनं दलत दथुइ अप्वयाच्वंगु असमझदारीं नेपाःया शान्ति प्रकृया सुढृढिकरणय् नकारत्मक प्रभाव लाइगु पाखे सचेत यानादीगु दु ।
मंगलवाः न्युयोर्कय् सार्वजनिक याःगु नेपाः सम्बन्धी वानया स्वलाःया प्रतिवेदनय् सत्तारुढ दलत दथुइ नं विभाजित जूगु व महत्वपूर्ण निर्णय यायेगु झ्वलय् परामर्श मजूगु न्ह्यथंनातःगु दु । दलत दथुइ असमझदारी बाबजुद नं शान्ति प्रकृयाय् छुं महत्वपूर्ण ज्या जुगुलिं धासा: महासचिव वानं लसता प्वंकादिल ।
अथेहे सेना समायोजन विशेष समिति गठक जुइधुंकूगु व माओवादीया पुल्हापिं लडाकूत पुनस्थापना प्रकृया बारे सहलह न्ह्याःगुलिं नं लसता प्वंकादिल । आः वइगु स्वलाःया दुने सिधइगु राष्ट्रसंघीय नियोग अनमिनया कार्यावधिबारे छुं खँ न्ह्यथनामदीसां वानं नेपाली पक्षं सेना समायोजन व पुनस्थापना क्वमचाःतल्ले अनिमिनया ल्वाभ अनुगमनकर्ताया भूमिका आवश्यक जूगु खँ धायात:गु दु । वानया प्रतिवेदनय् थ्वहे वाःलय् सुरक्षापरिषदय् सहलह जुइगु ज्याझ्व दु ।
