नागरिकताया आधारय् जक मतदाता परिचयपत्र

सर्वोच्च अदालतं फोटो सहितया मतदाता परिचयपत्रया निंतिं नागरिकतायात हे आधार दयेकेत अन्तरिम आदेश ब्यूगु दु ।

मधेसवादी दलतय्गु विरोधया लिपा मधेसवादी नेतात दथुइ जूगु सहमतिइ निर्वाचन आयोगं फोटोनापया मतदाता परिचयपत्र दयेकेत नागरिकता बाहेकया परिचयपत्रयात तकं मान्यता बीगु निर्णय यायेवं कानुन व्यवसायीत सरोजनाथ प्याकुरेल, ऋषिराम घिमिरे व ताराप्रसाद लामिछानें उकीया विरुद्ध मुद्दा दायर याःगु खः ।

मुद्दाय् न्यायाधीश प्रकाश वस्तीया एकल इजलासं थौं निर्णय यासें मुद्दाया अन्तिम निर्णय मजुतले फोटोनापया मतदाता परिचयपत्र दयेकेत नागरिकता बाहेकया मेमेगु परिचयपत्रयात मान्यता मबीत अन्तरिम आदेश जारी याःगु खः ।