कन्हय् स्वम्ह नेतातय्सं लिसः बीगु
गोरखाया पालुङटारय् जारी एकीकृत नेकपा (माओवादी)या खुक्वःगु विस्तारित मुँज्याया न्यान्हूया दिं थौं स्वंगूलिं प्रतिवेदनय् टिप्पणी यायेगु ज्या क्वचाःगु दु ।
थीथी राज्य समिति, जनवर्गीय संगठन नापं न्हय्गूलिं डिभिजनया प्रतिनिधित्सं नायः पुष्पकमल दाहाल 'प्रचण्ड' व न्वकूत मोहन वैद्य 'किरण' व डा. बाबुराम भट्टराई नं न्ह्यब्वःगु प्रतिवेदनय् टिप्पणी याःगु खः ।
फुक्कं प्रतिनिधितय्सं टिप्पणी यायेगु झ्वः क्वचाःगुलिं आः कन्हय् नायः व निम्ह न्वकूतय्सं लिसः बीगु ज्याझ्वः दु । दकलय् न्हापां न्वकू भट्टराई, वयां लिपा मेम्ह न्वकू किरण व दकलय् लिपा नायः प्रचण्डं लिसः बी ।
थौं न्ववापिं अधिकांश प्रतिनिधितय्सं नं स्वम्ह नेतात पाखे विभाजित जुयाः थःथःगु बिचाः प्वंकूगु खः । प्रचण्ड व किरण पक्षधरं भारतयात प्रमुख शत्रुया कथं न्ह्यब्वयेगु ज्या याःगु खःसा भट्टराई पक्षधरं महाधिवेशनया माग याःगु दु ।
कन्हय् सुथय् ७ बजे दकलय् न्हापां स्थायी समितिया मुँज्या च्वनीगु व वयां लिपा ९ बजे निसें जक बन्द सत्र सुरु जुइगु जानकारी पार्टी प्रवक्ता दिनानाथ शर्मां बियादिल ।
