माओवादी मुँज्या लिपा जक संसद : प्रधानमन्त्री
प्रधानमन्त्री माधवकुमार नेपालं माओवादी विस्तारित मुँज्या लिपा जक व्यवस्थापिका संसदया मुँज्याया च्वनीगु खँ धयादीगु दु ।
रुसया सेन्ट पिट्सवर्गय् क्वचाःगु विश्व बाघ सम्मेलनय् ब्वति कया थौं नेपाः लिहांझाम्ह प्रधानमन्त्री नेपालं त्रिभुवन अन्तराष्ट्रिय विमानस्थलय् पत्रकारनाप खँल्हाबंला यासें पालुङटारय् जुयाच्वंगु माओवादीया मुँज्या क्वचायेकाः माओवादी नेतात येँय् लिहांवये धुंकाः जक व्यवस्थापिका संसदया मुँज्या च्वनीगु धयादिल ।
बाघ सम्मेलनय् ब्वति कायेत रुस झायादीम्ह प्रधानमन्त्री नेपालं अन रुसी महासंघया प्रधानमन्त्री भ्लादमिर पुटिन नाप निगू देय्या हित व दुइपक्षिय स्वापूया बारे सहलह यानादीगु खः । खँल्हाबंलाय् रुसं नेपाःया उर्जा व पर्यटन क्षेत्रय् लगानी यायेगु इच्छा क्यंगु जानाकारी प्रधानमन्त्री नेपालं बियादिल ।
बाघ संरक्षण सम्बन्धी ज्या यानाच्वंगु विश्वया झिंस्वंगु देय्या सरकार प्रमुखतय्गु शिखर सम्मेलन वंगु नोभेम्वर २३ व २४ तारिखय् रूसया सेन्ट पिट्सवर्गय् जूगु खः ।
