पौडेलया उम्मेदवारी बारे एमालेया धापू वइगु
येँ (सन्ध्या टाइम्स)/वर्तमान सरकारया सिफारिसय् व्यवस्थापिका संसदया न्ह्यानाच्वंगु अधिबेशन अन्त्य याये धुंकाः आः प्रधानमन्त्रीया चुनावी प्रक्रिया अन्त्य जुइ ला कि मजुइ अले कांग्रेसया उम्मेदवार ल्यना च्वनी ला कि च्वनी मखु धइगु बारे आधिकारिक धारणा दयेकेत थौं एमाले स्थायी समितिया बैठक च्वनीगु जूगु दु ।
एमालेया अप्वः यानाः नेतातय्सं आः व्यवस्थापिका संसदया न्हूगु अधिबेशन सःतीगु इलय् प्रधानमन्त्रीया चुनाव प्रक्रिया मजूसे न्हूगु हे प्रक्रियां न्ह्याः वनी धकाः सार्वजनिक रुपं न्ववाना हयाच्वंगु जूसां पार्टीया आधिकारीक धारणा धाःसा थौं तिनि दयेकेत्यंगु खः ।
उगु मुँज्याय् प्रधानमन्त्रीया उम्मेदवारी कायम जुयाच्वनी ला कि मच्वनी धइगु बारे सहलह ब्याकेत थौंया मुँज्याय् एमालेया स्थायी समितिया दुजःत नापनापं कानुनी व्यवस्थाबारे जानकारी कायेगु नितिं धकाः पार्टीया कनुन विभागया दुजःतय्त नं सःतातःगु दु धकाः एमालेया छम्ह नेतां धयादीगु दु ।
संसद संचालन जुयाच्वंगु अवस्थाय् अध्यादेशया माध्यमं बजेट हये मजिउगु जुयाः संसदया अधिबेशन अन्त्य यानाः वर्तमान माधवकुमार नेपालया सरकारं अध्यादेशया माध्यमं वंगु शनिवाः बजेट हःगु खः ।
आः संसदया अधिबेशन सःतीगु अवस्थाय् नं प्रधानमन्त्रीया याकःचा उम्मेदवार रामचन्द्र पौडेलया उम्मेदवारी ल्यना हे च्वनी धकाः नेपाली कांग्रेसया नेतातय्सं दावी याना वयाच्वंगु दुसा कानूनविद्तय्सं ब्यागलं ब्यागलं कथंया थःथःगु मत तया वयाच्वंगु दु। अथे हे दलया नेतातय्सं नं ब्यागलं ब्यागलं कथं मत तया वयाच्वंगु दु ।
