पालि भाषाय् नं आपाःसिया रूची
येँ (सन्ध्या टाइम्स)/नेपाल बौद्ध परियत्ति शिक्षा अनुसन्धान समितिया ग्वसालय् वर्षावास स्वलायंकं जूगु पालि भाषा प्रशिक्षण ज्याझ्वःया न्हापांगु चरण क्वचाःपिं सहभागीतय्त वंगु शनिवाः नेपाल बौद्ध परियत्ति शिक्षाया सहशिक्षाध्यक्ष भिक्षु ज्ञानपूर्णिक महास्थविरपाखें दसिपौ लःल्हायेगु ज्या जुल ।
स्वीम्ह प्रशिक्षार्थीतय्त दसिपौ लःल्हानाबिज्यासें वसपोल भन्तेपाखें बुद्धं उपदेश बियाबिज्याःगु भाषाया रुपय् जुयाच्वंगु पालिभाषा धर्म अध्ययन याइपिंत तसकं महत्वपूर्ण जूगु कनाबिज्यात। वसपोलं थीथी विश्वविद्यालयय् थुकिया अध्यापनयात महत्व बियावं वनाच्वंगु व अन्तर्राष्ट्रिय बौद्ध सभा व सेमिनारय् पालि भाषाया माध्यमं ज्याखँ न्ह्याकेगु शुरु जुयावःगु खँ नं कनाबिज्यात ।
स्वलायंकं प्रशिक्षण बियाबिज्याःम्ह अनागारिका अग्गञाणी गुरुमापाखें प्रशिक्षार्थीतय्सं रुचिपूर्वक अध्ययन याःगु खँय् सन्तोष प्वंकाबिज्यात। सह केन्द्रीय परीक्षा नियन्त्रक भिक्षु निग्रोधं थुज्वःगु प्रशिक्षण ज्याझ्वःपाखें परियत्ति शिक्षाय् पालि भाषा स्यनेफुपिं जनशक्ति तयार जुइगु बिचाः प्वंकाबिज्यातसा संयोजक त्रिरत्न मानन्धरं सहभागीतय्सं पालि अध्ययनय् क्यंगु अभिरुचिं थुकिया निरन्तरता आवश्यक जूगु खँ कनादिल। अनुसन्धान समितिया दुजःपिं सविता धाख्वा व रश्मि राजकर्णिकार नापं प्रशिक्षार्थीपिं दुर्गा रेग्मी मानन्धर व जुजुमान महर्जनपिंसं नं पालि भाषाया महत्व बारे नुगःखँ तयादीगु खः ।
