'मुँज्याय् ब्वति काःपिं लडाकुत्यत शिविरय् लित छ्वये मज्यू'
नेपाली कांग्रेसया महामन्त्री प्रकाशमान सिंहं माओवादीया विस्तारित मुँज्याय् ब्वति काःपिं लडाकुतय्त शिविरय् लित छ्वये मज्यूगु खँ धयादीगु दु ।
नेपाल दलित संघं थौं येँ याःगु छगू ज्याझ्वलय् महामन्त्री सिंहं लडाकुयात विस्तारित मुँज्याय् ब्वति याकूगु प्रति आपत्ति प्वंकूसें शिविरय् लित छ्वये मज्यूगु धयादीगु खः । वय्कलं लडाकुतय्सं पार्टीया ज्याझ्वलय् ब्वति काःगु शान्ति प्रक्रिया अःख जूगु नं धयादिल ।
उखे सार्क डेमोक्रेसी चार्टरया सम्मेलनया उलेज्या यानादिसें कांग्रेस नेतृ नापं उपप्रधान मन्त्री सुजाता कोइरालां लडाकु समायोजन मयातले शान्ति प्रक्रिया निष्कर्ष मथ्यनीगु स्पष्ट यानादिसें थुकिया नितिं माओवादीया भुमिका महत्वपुर्ण व निर्णायक जुइगु धयादीगु दु ।
अथेहे मेगू छगू प्रशंगय् वय्कलं पार्टीया जिम्मेवार नेतां थःत उपसभापति मनोनयन यायेगु आश्वासन ब्यूगुलिं महामन्त्रीया उम्मेद्धारी लितकयागु स्पष्ट यानादिल ।
