'जुजु सहितया प्रजातन्त्रया निंतिं सहलह जुयाच्वंगु दु'

राष्ट्रिय प्रजातन्त्र पार्टी नेपालया नायः कमल थापां जुजु सहितया प्रजातन्त्रया निंतिं व्यवस्थापिका संसदय् दुथ्याःगु तःधंगु दलत दथुइ सहलह जुयाच्वंगु खुलासा यानादीगु दु ।

स्याङ्जाया वालिङय् थौं सुथय् पत्रकारतनाप खँल्हाबंला यानादिसें नायः थापां माओवादी, कांग्रेस व एमाले सहितया राजनीतिक दलतनाप जुजु सहितया प्रजातन्त्रया बारे सहलह जुयाच्वंगु धयादिल । वय्कलं देशय् शान्ति व स्थायित्वया निंतिं राजसंस्था अपरिहार्य जूगु नं धयादिल ।

म्हिग जक पाल्पाय् जूगु छगू ज्याझ्वलय् थापां माओवादी व जुजुवादी मिलेजुइमाःगु व उकीया निंतिं सांस्कृतिक जुजु वा जनवादी जुजु धकाः स्वीकार यायेत थःपिं तयार जूगु खँ धयादीगु खः ।