'नेतात छथाय् मुनाः शंका ज्यंके'
देय्या राजनीतिक पार्टीतय् दथुइ ब्वलनाच्वंगु शंका व अविश्वासया अवस्था मदयेकेगु लागिं फुक्कं पार्टीया शीर्ष नेतात गनं छथाय् मुनाः सहलह ब्याकेमाःगु प्रस्ताव प्रधानमन्त्री प्रचण्डं तयादीगु दु ।
थौं सुथय् प्रधानसेनापति प्रकरण बारे सहलह यायेत नेपाली कांग्रेसया सभापति गिरिजाप्रसाद कोइरालायात नापलायेगु झ्वलय् वय्कलं थ्व प्रस्ताव तयादीगु खः ।
थौंकन्हय् छगू पार्टीं धाःगु खँय् मेगु पार्टीं अविश्वास याइगु व उकिं यानाः छुं नं ज्या न्ह्यःने वने मफुगु कारणं दकलय् न्हापां थ्व अविश्वासया गाः निं जायेके माःगु बिचाः वय्कलं तयादीगु खः । थुकिया निंतिं फुक्कं पार्टीया शीर्ष नेतात पिने हे गनं भेला जुयाः सम्पूर्ण अविश्वास मदयेकेगु कुतः यायेमाःगु प्रस्ताव वय्कलं तयादीगु खँ सूत्रं धाःगु दु ।
थौं सुथय् कोइरालाया छेँय् कांग्रेस व माओवादी नेतातय् पुचः दथुइ जूगु वार्ता छुं हे लिच्वः पिमकासे क्वचाःगु खः । बैठकय् माओवादीं कटवालयात चीकां त्वःतेगु अडान न्ह्यब्वःगु खःसा कांग्रेसं कटवालयात चीके मजिउगु बिचाः लिसा काःगु खः ।
वार्ताय् माओवादीपाखें प्रम प्रचण्ड नापं डा. बाबुराम भट्टराई, रामबहादुर थापा व नारायणकाजी श्रेष्ठ वंगु खःसा नेकांपाखें कोइरालानापं शेरबहादुर देउवा, रामचन्द्र पौडेल व डा. रामशरण महत च्वंगु खः ।
