'राष्ट्रिय स्वाधीनताया रक्षा यासें क्रान्ति पूवंकेमाः'
गोरखाया पालुङटारय् न्ह्यानाच्वंगु एनेकपा (माओवादी)या खुक्वःगु विस्तारित मुँज्याय् थःगु प्रतिवेदन न्ह्यब्वसें नायः पुष्पकमल दाहाल 'प्रचण्डं' राष्ट्रिय स्वाधिनताया रक्षाया निंतिं राष्ट्रिय प्रतिरोध युद्धया तयारी यायेमाःगु धयादीगु दु ।
स्वन्हुया न्हि थौं सुथय् ८ बजे सुरु जूगु मुँज्याय् नायः प्रचण्डं विदेशी व घरेलु प्रतिक्रियावादी तत्वतय्सं राष्ट्रिय स्वाधीनता खतारय् लाकाच्वंगु धासें उकीया प्रतिरोध यानाः क्रान्तियात पूवंकेमाःगु धयादिल । वय्कलं राष्ट्रिय स्वाधीनताया रक्षा यानाः जक क्रान्ति पूवंनीगु धयादिल ।
वय्कलं थुकीया निंतिं पार्टी छप्पँ जुयाः न्ह्याः वनेगु विकल्प मदुगु खँय् बः बियादीगु खः । म्हिग न्वकूत मोहन वैद्य 'किरण' व डा. बाबुराम भट्टराईं थःथःगु प्रतिवेदनय् नायः प्रचण्डया कुखिंगु खःसा उकीया हे प्रतिरक्षा कथं प्रचण्डं थःगु गल्ती स्वीकार यासें मेपिंत नं थःथःगु गल्ती स्वीकार यायेत इनाप यानादिल ।
वय्कलं चुनुवाङ व खरिपाटीया मुँज्या तयार याःगु कार्यदिशा पार्टीया हे कार्यनीति जूगुलिं थुकीयात सुनां नं थःथःगु बिचाः धकाः व्याख्या यायेमज्यूगु धयादिल ।
प्रचण्डया प्रतिवेदन लिपा मुँज्याय् स्वंगूलिं प्रतिवेदन पेश यायेगु ज्या क्वचाःगु दुसाः आः न्हिनय् ३ बजे निसें थुकी सहलह जुइगु ज्याझ्वः दु ।
