लिम्बुवानया उपकमाण्डर त्वतेत माग यासें पूर्व बन्द

लिम्बुवान भोलेन्टियर्स फोर्सया उपकमाण्डर त्वतेत माग यासें संघीय लोकतान्त्रिक राष्ट्रिय पार्टीं आव्हान याःगु निन्हुयंकया लिम्बुवान बन्दया थौं न्हापांगु न्हि पूर्वाञ्चलया गुंगू जिल्ला प्रभावित जूगु दु ।

वंगु कात्तिक १५ गते मोरङया बयरबनपाखें ज्वंम्ह लिम्बुयात त्वतेत माःगु माग यासें पूर्वया ताप्लेजुङ, झापा, इलाम, पाँचथर, सुनसरी, धनकुटा, मोरङ लगायतया जिल्लाय् राष्ट्रिय पार्टीं बन्दया आव्हान याःगु खः ।

बन्दया कारणं प्रमुख रुपं अनया यातायात प्रभावित जूगु दु । शिक्षण संस्था, कलकारखाना, ज्याकूथीलय् धाःसा आंशिक रुपं जक प्रभाव लाःगु दु । बन्दकर्तातय्सं कुटनितिक नियोगया गाडी, एम्बुलेन्स, दमकल आदि अत्यावश्यक सेवायात सवारी साधन धाःसा चले जुइबीगु धाःगु दु ।