निम्ह न्वकूतय्यसं प्रतिवेदन न्ह्यब्वल

एनेकपा (माओवादी)या खुक्वःगु विस्तारित मुँज्याया निन्हुया न्हि थौं पार्टीया निम्ह न्वकूत डा. बाबुराम भट्टराई व मोहन वैद्य 'किरणं' थःथःगु प्रतिवेदन न्ह्यब्वःगु दु । निम्ह न्वकूतय्सं प्रतिवेदन न्ह्यब्वयेवं थौंया मुँज्याया ई क्वचाःगुलिं नायः पुष्पकमल दाहाल 'प्रचण्डं' थःगु प्रतिवेदन कन्हय् जक न्ह्ब्वइगु जूगु दु ।

थौं दकलय् न्हापां थःगु प्रतिवेदन न्ह्यब्वसें न्वकू भट्टराईं संविधानसभा पाखें जनताया संघीय गणतन्त्र संस्थागत यायेमाःगु खँय् बः बियादीगु खः । वय्कलं आः हे विदेशी प्रतिक्रियावादी नाप ल्वायेगु स्वयां न्हापा देय् दुनेया प्रतिगामीतय्त परास्त यायेमाःगु खँ धयादीगु खः ।

वय्कलं पार्टी दुने खनेदुगु विवाद यदि विस्तारित मुँज्यां ज्यंके मफुसाः महाधिवेशनं लिच्वः पिकायेमाःगु धासें पार्टीयात छप्पँ यानाः यंकेगु विकल्प मदुगु धयादिल ।

अथेहे मेम्ह न्वकू किरणं न्ह्यब्वःगु प्रतिवेदनय् जनताया संविभान निर्माण जुइमबीत साम्राज्यवादी व विस्तारवादीत लगे जुयाच्वंगुलिं जनयुद्धया जगय् क्रान्ति पूवंकेमाःगु खँय् बः ब्यूगु दु । प्रतिवेदनय् वय्कलं भारतयात प्रमुख शत्रुया कथं व्याख्या यानादीगु खः ।

निम्हं न्वकूतय्सं न्ह्यब्वःगु प्रतिवेदनय् पार्टी नायः प्रचण्डया बारे नं कुंखिनातःगु दु । भट्टराईं प्रचण्डयात व्यक्तिवादी जूगु द्वपं ब्यूगु दुसाः किरणं प्रचण्डं हेडक्वाटर धकाः थः याकःयात जक तायेकाच्वंगु द्वपं बियादीगु दु ।

निम्ह न्वकूतय् प्रतिवेदन लिपा नायः प्रचण्डं कन्हय् ८ बजे थःगु प्रतिवेदन न्ह्यब्वइगु ज्याझ्वः दुसाः वयां लिपा स्वंगूलिं प्रतिवेदनय् सहलह यानाः राज्य समितिया प्रतिनिधितय्सं सुझाव बीगु ज्याझ्वः दु ।