पालुङटारय् बन्दसत्र सुरु

गोरखाया पालुङटारय् जुयाच्वंगु एनेकपा (माओवादी)या खुक्वःगु विस्तरित मुँज्याय् बन्दसत्र सुरु जूगु दु । सोमवाः सुथय् ८ बजे निसें बन्द सत्र सुरु जूगु खः । मुँज्याय् पार्टी न्वकू डा. बाबुराम भट्टराईजुं थःगु प्रतिवेदन न्ह्यब्वयाच्वनादीगु दु ।

थ्व लिपा पार्टी न्वकू मोहन वैद्य 'किरण' व नायः पुष्पकमल दाहाल 'प्रचण्डं' थःथःगु प्रतिवेदन पेश याइ । स्वंगूलिं प्रस्तावय् बन्द सत्रय् सहलह जुइसाः स्वंगूलिं प्रस्तावय् फुक्कं राज्य समितिया स्वम्ह-स्वम्ह प्रतिनिधितय्सं थःथःगु बिचाः प्वंकी ।

नेतातय्सं थःथःगु बिचाः प्वंकेधुंकाः प्रतिवेदन पेश याःपिं स्वम्हं नेतातय्त स्पष्टीकरण बीगु ई फ्यानातःगु दु । वयां लिपा पार्टी नायःजुं संश्लेशित बिचाः प्वंकीगु ज्याझ्वः दु ।