शान्ति सम्झौता अःख ज्या मयायेत माओवादीया ध्यानाकर्षण
व्यवस्थापिका संसदय् दुथ्याःगु न्हय्गू राजनीतिक दलं विस्तृत शान्ति सम्झौता व पुलांगु सहमति अःख ज्या मयायेत माओवादीया ध्यानाकर्षण याःगु दु ।
नेकपा (एमाले)या आह्वानय् एमालेया मू ज्याकू बल्खुइ च्वंगु न्हय्गू दलया मुँज्यां देय् जटिल मोडय् दुगु व राष्ट्रिय सहमति आःया मू आवश्यकता जूगु धासें माओवादीयात शान्ति प्रकृयालय् याःगु सम्झौतापाखें विचलित मजुइत इनाप याःगु दु । नापं शान्ति व राष्ट्रिय सहमतिया पक्षय् जिम्मेवार जुइत नं इनाप याःगु दु ।
अथेहे मुँज्यां बजेट न्ह्यब्वय्गु झ्वलय् माओवादी सभासदतय्सं अर्थमन्त्रीयात याःगु आक्रमण लोकतान्त्रिक पद्धती, देय्या अर्थतन्त्र व संसदीय मूल्य मान्यताय् याःगु जघन्य आक्रमण जूगु ठहर याःगु दु । माओवादी व घटनाय् संलग्न सभासदतय् ज्याया मुँज्यां निन्दा व भर्त्सना याःगु दु ।
मुँज्यां माओवादीया थनिंनिसें सुरु जूगु खुक्वःगु विस्तारित मुँज्याय् लडाकूतय्सं ब्वति काःगुयात शान्ति सम्झौताया गम्भीर उलंघन जूगु ठहर याःग दु । शान्ति प्रकृयाया अनुगमन यानाच्वंगु अनमिनं तकं लडाकुतयात ब्वति मयाकेत पौ च्वःगु खःसां माओवादीं जर्बजस्ती विस्तारित मुँज्याय् लडाकुतय् ब्वति कायेकूगु ठहर न्हय्गू दलं याःगु दु ।
मुँज्या लिपा नेपाली कांग्रेस, नेकपा (एमाले), मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी, नेकपा (माले), राष्ट्रिय जनशक्ति पार्टी व दलित जनजाति पार्टीया शीर्ष नेतातय्सं पिथंगु विज्ञप्तिइ माओवादीं सम्झौता उल्लंघन याःगु खँ न्ह्यथंनातःगु दु ।
