माओवादीया खुक्वःगु विस्तारित मुँज्या सुरु
एकीकृत नेकपा (माओवादी)या खुक्वःगु विस्तारित मुँज्या थनिंनिसें गोरखाया पालुङटारय् सुरु जूगु दु । माओवादी नायः पुष्पकमल दाहाल 'प्रचण्डं' उलेज्या यानादीगु उगु मुँज्या न्यान्हु तक न्ह्याइगु ज्याझ्वः दु ।
उलेज्या ज्याझ्वलय् नायः प्रचण्डं पार्टी दुने वैचारिक संघर्ष दुसां विस्तारित मुँज्या लिपा पार्टी थप छधि छप्पँ जुइगु दावी यानादिल । पार्टीयात तछ्यायेत स्वयाच्वंपिं यक्व दुगु धासें प्रचण्डं तर आः मुँज्याय् जुइगु सहलह लिपा पार्टी झन एकताकद्ध जुया वइगु धयादिल ।
वय्कलं जनआन्दोलन व जनयुद्धपाखें प्राप्त उपलब्धित तनीगु अवस्था वःगुलिं थुकीयात संस्थागत यायेगु लागि नं मुँज्यां ठोस योजना दयेकीगु धयादिल । वय्कलं प्रतिक्रान्तिकारी शक्तित माओवादी विरुद्ध षड्यन्त्र यानाच्वंगु द्वपं नं बियादिल ।
मुँज्या सुरु जुइ न्ह्यः माओवादीया भातृ संगठन वाईसीएलं मार्चपास याःगु खः । कन्हय् निसें सुरु जुइगु बन्द सत्रय् नायः प्रचण्ड सहित न्वकूत मोहन वैद्य 'किरण' व डा. बाबुराम भट्टराईया प्रतिवेदनय् सहलह जुइगु ज्याझ्वः दु ।
