शान्ति सम्झौता जूगु प्यदँ पूवन
सरकार व तत्कालीन विद्रोही पक्षं शान्ति सम्झौताय् ल्हाःचिं तःगु थौं न्यादँय् क्यंगु दु । थंनि प्यदँ न्ह्यः २०६३ साल मंसिर ५ गते सरकारया पाखें तत्कालीन प्रधानमन्त्री गिरिजाप्रसाद कोइराला व माओवादी नायः पुष्पकमल दाहाल 'प्रचण्डं' झिदँया युद्ध क्वचाःगु घोषणा यासें विस्तृत शान्ति सम्झौताय् ल्हाःचिं तःगु खः ।
शान्ति सम्झौताय् ल्हाःचिं तःगु प्यदँ पूवसां अझ नं शान्ति प्रकृया क्वचाःगु मदुनी । अझ थुली ईया दुने यायेमाःगु आपालं ज्या पूवंनेफुगु मदुनि । शान्ति प्रक्रिया पूवंकेत माओवादी लडाकु समायोजन व पुनःस्थापना, न्हूगु संविधान निर्माण व पीडितयात न्याय बिइगु प्रमुख स्वंगू प्रतिबद्धता अलपत्रय् लाःगु दु । शान्ति सम्झौताया मू हाथ्या कथं कयातःगु लडाकु समायोजन जुइमफयेवं शान्ति प्रक्रिया अझं जटिल मोडय् थ्यंगु दु ।
द्वन्द्वपीडितयात न्याय बिइत याःगु प्रतिबद्धता नं पूवंके फुगु मदुनि । सत्य निरुपण व मेलमिलाप आयोग नापं बेपत्ता यानातःपिं नागरिकतय्त मालेगु सम्वन्धी आयोग गठनया प्रतिबद्धता पूवंकेत नं शान्ति सम्झौताया पक्षधर शक्ति तत्पर जूगु खनेमदु ।
देशय् विद्यमान वर्गीय, जातीय, क्षेत्रीय, लैंगिक नापंया समस्या ज्यंकेत राज्यया पुनर्संरचना यानाः देय्या दक्वं निकायलय् समावेशी सिद्धान्त नालेगु ज्या अझ ल्यँ दनी ।
शान्ति सम्झौताया पालना यायेत निगूलिं पक्ष गम्भीर मजूगु कारणं प्यदँ लिपा नं बृहत शान्ति सम्झौतय् न्ह्यथनातःगु ज्याखँ पूमवंगु खँय् संका मदु ।
