रायमाझी न्हूम्ह प्रधानन्यायाधीश
सर्वोच्च अदालतया न्हूम्ह प्रधानन्यायाधीश पदय् मिनबहादुर रायमाझीयात नियुक्त यायेगु बारे राजनीतिक पार्टीतय् दथुइ सहमति जूगु खँ सीदुगु दु ।
थुकिया बारे म्हिगः च्वंगु संवैधानिक परिषदया बैठकय् सहमति जूगु खःसा मधेशी जनअधिकार फोरमया प्रतिनिधि मदुगुलिं म्हिगः निर्णय धाःसा याये मखन । थौं हानं च्वनीगु परिषद बैठकं थुकिया बारे निर्णय याइगु खँ धाःगु दु ।
प्रधानन्यायाधीशया लागिं सिफारिस यानातःपिं खुम्ह न्यायाधीशत मध्यय् रायमाझी वरिष्ठ खः । प्रधानन्यायाधीश ल्ययेगु ज्याय् नं सरकारं मर्यादाक्रम मिचे यानाः मेपिंत हइ धकाः न्यायाधीशतय्सं उकुन्हुंनिसें थीथी दवावमुलक ज्याझ्वः याना वयाच्वंगु खः । देय्या मेमेगु ख्यलय् थें न्यायालयय् नं अज्याःगु ज्या मजुइमा धकाः सरकारयात दवाव बिया वयाच्वंगु कारणं सरकारं वरिष्ठ न्यायाधीशयात स्वीकृत याःगु खँ धाःगु दु ।
