विस्तारित मुँज्या न्यान्हु तक जुइगु, लडाकुतय्सं ब्वति मकाइगु

एकीकृत नेकपा (माओवादी)या खुक्वःगु विस्तारित मुँज्या थनिंनिसें न्यान्हु तक गोरखाया पालुलुङटारय् न्ह्याइगु जूगु दु । विस्तारित मुँज्या स्वयां न्ह्यः थौं सुथय् पालुङटारय् हे च्वंगु माओवादी स्थायी समितिया मुँज्यां विस्तारित मुँज्यायात स्वंगू ब्वय् न्यान्हु तक न्ह्याकेगु क्वःछिउगु दु ।

स्थायी समितिं थौं उल्लेज्या ज्याझ्व, कन्हय् निसें स्वंगू प्रतिवेदनय् सहलह व लिप्पांगु न्हि समापन ज्याझ्वः यानाः न्यान्हुया ज्याझ्वः यायेगु निर्णय याःगु खः । स्थायी समितिया थुगु निर्णयायात केन्द्रीय समितिया मुँज्यां अनुमोदन याःगु दु ।

कन्हय् निसें सुरु जुइगु प्रतिवेदनय् नायः व निम्ह न्वकूतय् स्वंगू बिस्कं बिस्कं प्रतिवेदन पेश यायेगु निर्णय नं स्थायी समितिं याःगु दु । नायः पुष्पकमल दाहाल 'प्रचण्डं' निम्ह न्वकूतय् प्रतिवेदनय् दुथ्याकातःगु छुं छुं बुँदात नं दुथ्याकाः न्हूगु प्रतिवेदन पेश याइगु ज्याझ्वः दु ।

स्वंगूलिं प्रतिवेदनय् राज्य समितिया न्याद्वःलं मल्याक प्रतिनिधितय्सं अध्ययन यानाः सहलह याइगु धाःगु दु । उखे तसकं विवादय् लानाच्वंगु मुँज्याय् लडाकूतय् ब्वतिया विषय धाःसा समाधान जूगु दु । स्थायी समिति मुँज्याय् लडाकूतय्त ब्वति मकायेकीगु निर्णय याःगु दु ।

विस्तारित मुँज्याय् ब्वति कायेत देयन्यंकया खुद्वः माओवादी नेता व कार्यकर्तात गोरखाया पालुङटारय् थ्यंके धुंकूगु दु । माओवादीं थःगु न्हूगु कार्ययोजना दयेकीगु जूगुलिं थुगु मुँज्यायात राजनीतिक ख्यलं तसकं महत्व बियाः स्वयाच्वंगु दु ।