सरकार पाखें ३ खर्ब ३७ अर्ब ९० करोडया बजेट
कामचलाउ सरकारं चालु आर्थिक दँ २०६७/६८या निंतिं ३ खर्ब ३७ अर्ब ९० करोडया बजेट अध्यादेश पाखे विनियोजन याःगु दु ।
पुलांगु हे ज्याझ्वःत दुथ्याकाः अर्थमन्त्री डा. सुरेन्द्र पाण्डें शनिवाः न्ह्यब्वयादीगु बजेट भौतिक पूर्वाधारयात प्राथमिकता बियादीगु दु । कुल खर्च मध्ये विकास निर्माणयात ५२.१ प्रतिशत फ्याःगु दु । कुल बजेटया ५२.९ अर्थात १ खर्ब ७८ अर्ब ६१ करोड ३९ लख विकास निर्माण विनियोजन याःगु दु ।
चालु आर्थिक बजेटया निंतिं राजस्व पाखें २ खर्ब १६ अर्ब ६४ करोड ४४ लाख व वैदेशिक अनुदान पाखें ६५ अर्ब ३४ करोड ४२ लख यानाः २ खर्ब ८१ अर्ब ९८ करोड ८६ लख न्यून बजेट मुंकेगु ताः सरकारं तःगु दु ।
आर्थिक बजेटय् साधारण प्रशासनयात ५९ अर्ब २८ करोड ६१ लख विनियोजन याःगु दु । सामाजिक सुरक्षा भत्तायात निरन्तरा बीत ८ अर्ब ९५ करोड व गरीबी निवारणया निंतिं लक्षित पुचः ज्याझ्वःया निंतिं ३ अर्ब ४ करोड बजेट फ्याःगु दु । अथेहे शिक्षा क्षेत्रया निंतिं ५७ अर्ब ६५ करोड बजेट विनियोजन याःगु दु ।
राष्ट्रपति डा. रामवरण यादवं अध्यादेश मार्फत जारी याःगु बजेटय् माओवादी लडाकु समायोजन व पुर्नस्थापना मजुतल्ले शिविर व्यवस्थापनया निंतिं १ अर्ब ८८ करोड विनियोजन याःगु दु ।
सरकारं आर्थिक विकास कथं जलविद्युतय् ६० मेगावाट त्रिशुली तेस्रो ए, १४ मेगावाटया कुलेखानी तेस्रो, ३० मेगावाटया चमेलिया व ३० मेगावाटया राहुघाट जलविद्युत निर्माण ज्या क्वचायेकेत बजेट विनियोजन याःगु दु ।
