लडाकूतय् ब्वति बारे माओवादीं अनमिननाप सहलह याइगु

नेपाः स्थित राष्ट्रसंघीय मिसन अनमिनं माओवादीया खुक्वःगु विस्तारित मुँज्याय् लडाकूतय्सं ब्वति काःसा शान्ति सम्झौता विपरित जुइगु धकाः माओवादीयात पौ च्वयेवं उकीया बारे माओवादीं अनमिननाप सहलह यानाः निर्णय याइगु जूगु दु ।

अनमिनया अभिव्यक्ति सार्वजनिक जुइवं शुक्रवाः च्वंगु माओवादी स्थायी समितिया मुँज्यां लडाकूतय्त बिस्तारित मुँज्याय् ब्वति याकेगु वा मयाकेगु बारे अनमिननाप सहलह यानाः जक निर्णय यायेगु क्वःछिउगु दु ।

अथेहे स्थायी समितिया मुँज्याय् विस्तारित मुँज्याय् पेश जुइगु स्वंगू प्रतिवेदनया बारे नं सहलह जूगु खः । माओवादीया मेगू स्थायी समितिया मुँज्या गोरखाया पालुङटार स्थित बिस्तारित मुँज्या स्थलय् च्वनेगु व उगु मुँज्यां विस्तारि मुँज्याया ज्याझ्वः क्वःछीगु निर्णय याःगु दु ।