लडाकूतय्त ब्वति मयाकेत अनमिनपाखें ध्यानाकर्षण
नेपाः स्थित राष्ट्रसंघीय मिसन अनमिनं माओवादीयात पार्टीया खुक्वःगु विस्तारित मुँज्याय् लडाकूतय्त ब्वति मयाकेत ध्यानाकर्षण याकूगु दु ।
अनमिन प्रमुख करिन ल्यानग्रेनं बिहीवाः माओवादी नायः पुष्पकमल दाहाल 'प्रचण्ड'यात छपू पौ च्वयाः अज्याःगु ध्यानाकर्षण याकूगु खः । अनमिनं माओवादीया खुक्वःगु विस्तारित मुँज्या राजनीतिक प्रकृतिया जूगु धासें अज्याःगु ज्याझ्वलय् लडाकूतय्त ब्वति याकूसाः शान्ति सम्झौता व सेना व ल्वाभः व्यवस्थापन अनुगमन सम्बन्धी सम्झौताया भावना विपरित जुइगु धाःगु दु ।
माओवादीं लडाकूतय्सं न्हापा नं विस्तारित मुँज्याय् ब्वति कयाच्वंगु व थुगुसी नं ब्वति काइगु खँ न्ह्यथंनाच्वंगु इलय् लडाकूतय्त अनुगमन यानाच्वंगु निकायया थुगु अभिव्यत्ति सार्वजनिक जूगु खः । थ्वस्वयां न्ह्यः नं मन्त्री लगायत थीथी दलया नेतातय्सं नं माओवादीया विस्तारित मुँज्याय् लडाकूतय्त ब्वति मयाकेत इनाप याःगु खः ।
