थारु जनतां यानाच्वंगु माग

सरकार प्रधानसेनापतियात गय् यानाः चीकेगु धइगु ध्याउन्नाय् लगे जुयाच्वंगुलिं देय्या ४० लाख थारुतय्सं सम्पूर्ण तराई ठप्प जुइक यानाच्वंगु आन्दोलन नं मिखां मखनाच्वन । थारु जनतां थःपिनि म्हसीकायात मधेशी दुने ल्वाकछ्यायेत्यंगु सरकारी कुतःया विरोधय् पूरा देय् हे अस्तव्यस्त जुइक आन्दोलन यायेधुंकलं नं सरकारं उखेपाखे पटक्क हे ध्यान मबिउगुलिं सर्वसाधारण जनता उकिया मार फयेत बाध्य जुयाच्वंगु दु । आन्दोलनं यानाः तराईया राजमार्ग पूर्ण रुपं बन्द जुयाच्वंगु दुसा उकिं यानाः न्हियान्हिथंयात माःगु खाद्यान्न पेट्रोलियम पदार्थ आदि थेंज्याःगु सामानया ढुवानी यायेत समस्या जुयाच्वंगु दु । सामानया नियमित आपूर्ति मजूगुलिं बजारय् अनावश्यक रुपं भाः थहां वनाच्वंगु दुसा गन अज्याःगु ज्वलं उत्पादन जुइगु खः उपिं चाहिं बजाः मदयाः उत्पादित ज्वलं वांछ्वयेत बाध्य जुयाच्वंगु दु ।

वास्तवय् थ्व इलय् थारुतय्सं सरकारयाके छुं तःधंगु माग यानाच्वंगु मदु । सरकारं हःगु विधेयकय् उमित मधेशीया धलखय् लाका तःगु दु । थःपिंत मधेशी धाये मते थारु धया बिउ धइगु जक उमिगु बिन्ति खः । थथे यायेत सरकारया दां खर्च जुइगु नं मखु छुं लगानी लाइगु नं मखु । उमिगु थ्व माग पूवंका बी धकाः सरकारं बचं नं बीधुंकूगु खः । तर बचं बिउ कथं माग पू मवं । अय् जुयाः थम्हं बिउगु बचं पूवंकि धकाः थारु जनतां थ्व आन्दोलन यानाच्वंगु खः । आन्दोलनया झ्वलय् प्रहरीयात छुरां सूगु तकया खबर पिहां वःगु
दु । थज्याःगु घटना अझ मेगु मजुइमा । उकिं सरकारं इलय् हे हानं वार्ता यानाः गय् यानाः जिउ माग पूवंकेगुपाखे पहल यायेमाःगु नितान्त आवश्यक दु ।

More Stories Like this