हैटीया हैजा नेपाःपाखें हे?

येँ (सन्ध्या टाइम्स)/हैटीइ महामारी जुयाः न्यनावंगु हैजा ल्वय् नेपाःपाखें हे ब्वलंगु दावी स्वीडेनया छम्ह कुटनीतिज्ञं याःगु दु। हैटीया लागिं स्वीडेनया राजदूत क्लास ह्यामरं स्वीडेनं पिहां वइगु न्हिपौ 'स्भेन्स्का डागब्लाडेट' यात म्हिगः बियादीगु छगू अन्तर्वार्ताय् थ्व खँ धयादीगु खः।
वंगु निवाः न्ह्यः तिनि हैटीं लिहां वःम्ह राजदूत ह्यामरं थःत थ्व खँ छगू कुटनीतिक सूत्रपाखें हे वःगु खः धासें धयादिल, 'थ्व १०० प्रतिशत हे सत्य खः। थुकिया परीक्षण जुइधुंकूगु दु। उकिया स्रोत नेपाः हे खः ।'

वंगु नोभेम्बर १ कुन्हु अमेरिकाया युएस सेन्टर फर डिजिज कन्ट्रोल एण्ड प्रिभेन्सनपाखें हैटीया हैजा दक्षिण एशियापाखें वःगु खः धासें नेपालं हे वःगु खः धइगु द्वपंयात अस्वीकार याःगु खः। लिसें संयुक्त राष्ट्र संघं नं नेपालं हे हैजा न्यनावंगु खः धइगु खँयात अस्वीकार याःगु खः। अथे हे नेपाली सेनां नं थःपिंपाखें हैजा न्यनावंगु खँयात अस्वीकार याना वयाच्वंगु दु। नेपाली सेनां म्हीग तिनि थ्व द्वपंयात खण्डन यासें विज्ञप्ति पिकाःगु खःसा म्हिगः हे स्वेडिश कुटनीतिज्ञया थ्व धापू सार्वजनिक जूगु खः ।

हैटीइ ब्वलंगु थ्व हैजां आः तक द्वःछिम्ह मनू सीधुंकूगु दु। थ्व ल्वय् नेपाःया शान्ति सेनां हःगु खः धासें अनया केप हाइटेन शहरय् नेपाली सेनायात आक्रमण समेत याःगु खः ।