संविधानसभा कार्यतालीका हाकनं परिवर्तन
संविधान निर्माण कार्यतालिका हाकनं छक्वः हिउगु दु । संविधानसभा कार्यव्यवस्था परमार्श समितिया मंगलवाः च्वंगु बैठकं संविधानसभा कार्यतालीका हिउगु खः ।
भदौ मसान्त तक संविधानया न्हापांगु मस्यौदा तयार यानाः राजपत्रय् सार्वजनिक यायेमाःगु यात आः असोज मसान्त तक थ्यंकूगु दु ।
मंगलवाः च्वंगु समितिया बैठकं कार्यतालीका हिलेगु निंतिं संविधानसभायात सिफारिस यायेगु निर्णय याःगु खः ।
विषयगत समितिं संविधानया प्रारम्भिक मस्यौदा बुधवाः तक तयार यायेमाःगु यात आः उकीयात जेष्ठ ८ धइगु खँग्वः थप यायेगु निर्णय याःगु दु । विषयगत समितितय्सं पेश यायेमाःगु प्रतिवेदनय् सहलह जेष्ठ ९ गते निसें असार ३१ तक जुइगु जूगु दु । आःया कार्यतालीका कथं जेष्ठ महिना दुने सहलह यायेगु खँ न्ह्यथंनातःगु दु ।
संवैधानिक समितिं तयार याःगु प्रतिवेदनय् असोज १ गते निसें २५ गते तक सहलह याइगु जूगु दु । न्हापा थुकीया बारे सहलह यायेत भदौ २५ तकया ई क्वछिनातःगु खः ।
