माओवादीया विस्तारित बैठकं उच्चस्तरीय कार्यदल प्रभावित
हदबन्दीया खँय् विवाद
येँ (सन्ध्या टाइम्स)/एकीकृत माओवादीया वइगु ५ गतेनिसें विस्तारित मुँज्या जुइगु जुयाः उच्च स्तरीय राजनीतिक कार्यदल प्रभावित जूगु दु ।
न्हूगु संविधान दयेकेगु निंतिं दलतय्गु दथुइ जुयाच्वंगु विवाद ज्यंकेत धकाः माओवादी अध्यक्ष प्रचण्डया नेतृत्वय् दयेकूगु उगु कार्यदलया मुँज्या आः मंसीर १५ गते जक च्वनीगु जूगु दु। कार्यदलया मुँज्या थौं च्वनाः उकथं मंसीर १५ गते जक मेगु बैठक च्वनेगु खँ क्वःछिउगु खः। थौंया मुँज्याय् नं जमीनया हदबन्दी विषययात कयाः दलया नेतातय् दथुइ सहमति जुइ मफुत। म्हिगः नं अथे हे जमीनया हदबन्दी विषयय् च्वंगु मुँज्याय् सहमति जुइ मफुगु खः। हदबन्दीसिबें अप्वः दुगु जग्गा सरकारं अधिग्रहण यायेगु झ्वलय् क्षतिपूर्ति बीगु लाकि मबीगु धइगु खँय् दलया नेतातय् दथुइ विवाद जुयाच्वंगु खः ।
कार्यदलय् दुथ्याःगु न्हय्गू पार्टीत मध्ये माओवादी व नेमकिपां जक हदबन्दीसिबें अप्वः दुगु जग्गा अधिग्रहणया इलय् क्षतिपूर्ति बीम्वाः धयाच्वंगु दुसा मेमेगु दलतय्सं बीमाः धयाच्वंगु दु ।
