अनमिनं गुन्टा कसे यायेगु शुरु यात
येँ (सन्ध्या टाइम्स)/नेपाः सरकारं म्याद थपे यायेगु खँ आलटाल याःगुलिं अन्ततः निला लिपा अनमिन लिहां हे वनीगु जूगु दुसा उकिया लागिं थ्वं थःत म्वाःगु सामान लिलाम यानाः थन हे मिया थकेगु प्रक्रिया नं शुरु याःगु दु ।
अनमिन बन्द यानाः लिहां वनेबलय् थःपिंत आवश्यक मजूगु कम्प्युटर, गाडी, ततःग्वःगु मेशिन, फर्निचर आदि सामान थन हे मिया थकेत अनमिनं लिलामया सुचं नं पिकायेगु शुरु याःगु दु। छुं छुं सामानया लिलामया सुचं पिकायेधुंकूगु दुसा आः छसिकथं मेमेगु सामानया नं लिलाम सम्बन्धी सुचं पिकायेगु तयारी जुयाच्वंगु खँ अनमिन सूत्रं कंगु दु ।
अनमिनं सामान लिलामया ज्या नापं शुरु याःगुया अर्थ थ्व निकाय आः लिहां वनेगु पक्का जूगु खः। अनमिनं वीरेन्द्र अन्तर्राष्ट्रिय सम्मेलन केन्द्रया थःपिनि ज्याकू सीमित नं यायेधुंकूगु दु ।
