न्हूदँया लसताय् उदाय् समाजया भिंतुना मुना

येँ (सन्ध्या टाइम्स)/ने.सं. ११३१ कछलाथ्व सप्तमी शनिवाः कुन्हु उदाय् समाजया ग्वसालय् थनया श्री दिगुख्यः गुथि, पकनाजोलय् न्हूदँया लसताय् भिंतुना कालबिल व तुच्चा ज्याझ्वः जुल ।

उदाय् समाजया नायः डा. रुपज्योति कसाःया सभापतित्वय् न्ह्याःगु उगु ज्याझ्वलय् समाजया संरक्षक भाजुपिं कुलवीरसिंह तुलाधर, द्रव्यमानसिंह तुलाधर, उदाय् समाजया संस्थापक नायः नापं पदेन दुजः नानीभाइ स्थापित व निवर्तमान नायः पंचवीरसिंह तुलाधरपिं नं दीगु खः ।

ज्याझ्वलय् छ्याञ्जे रमेश तुलाधरं समाजं न्ह्याका वयाच्वंगु गतिविधि न्ह्यब्वयादीगु खः। थुकिया लिसें वय्कलं उदाय् समाजयात उदाय् छेँ प्राप्त जुसांनिसें उकिया मर्मत संभार यायेगु ज्याय् थःपिं न्ह्यज्यानाच्वनागु खँ नं कनादिल। ज्याझ्वःया दथुइ वय्कलं उदाय् समाजं उदाय् मस्तय्गु शैक्षिक योग्यता च्वन्ह्याकेया निंतिं उदाय् मस्तय्त थीथी शैक्षिक तगिमय् छात्रवृत्ति बीगु ज्या नं शुरु जुइधुंकूगु जानकारी बिसें विधान दर्ता लिपा उकियात माःकथं परिमार्जित यानाः संशोधन यायेगु व विनियमत दयेकेगु ज्या नं यायेगु खँ कनादिल। थुकिया लिसें न्हूगु ज्याकथं कानुनी परामर्श, स्वास्थ्य क्लिनिक व आर्थिक सुधारया पक्षय् माइक्रो फाइनान्स न्ह्याकेगु थःपिनि ग्वसाः दुगु जानकारी नं बियादिल ।

थीथी व्यक्तित्वपिंसं भिंतुना न्वचु नं बियादीगु उगु ज्याझ्वलय् संरक्षक कुलवीरसिंह तुलाधरं उदाय् समाजया कोषय् दुतिंकेत छगू लख दां बियादीगु खः। थ्वहे झ्वलय् उदाय् समाजया मेम्ह संरक्षक द्रव्यमानसिंह तुलाधरं नं समाजया कोषय् छगू लख दां तयादीगु खः ।

उदाय् समाजया न्वकु नापं न्हूदँ समारोह प्रबन्ध उपकमिटीया कजि डा. प्रेमरत्न स्थापितं लसकुस यानादीगु उगु ज्याझ्वलय् वय्कलं दँय्दसं न्हूदँया लसताय् न्ह्याका वयाच्वनागु उदाय् समाजया थुज्वःगु ज्याझ्वलं आः वयाः उदाय् समाजया आर्थिक, सामाजिक, शैक्षिक व मेमेगु ज्याझ्वःत नं न्ह्याकावनेगु खँ कनादिल ।