'माया' क्यनाः वःगु दां सामाजिक ज्याय्
येँ (सन्ध्या टाइम्स)/जातीय विभेदया विषय कःघानाः निर्माण जूगु नेपालभाषाया संकिपाः "माया" युनिभर्सल ल्याय्म्ह पुचःया ग्वसालय् येँया राष्ट्रिय नाचघरय् क्यन।
संकिपा "माया" या मूल विषय नेवाः समाजय् ब्वलनाच्वंगु जातीय विभेदया भावना खः। न्हापांनिसें नेवाः समाजय् गुज्वःकथं जातया नामय् थीत्यः मत्यःया भावना ब्वलनाच्वंगु दु अले उकिं गुज्वःगु लिच्वः लाकाच्वंगु दु धइगु खँ संकिपाय् मायाया माध्यमं क्यनातःगु दु ।
'नेवाः भाय् प्रचारप्रसारया निंतिं थुगु संकिपा प्रदर्शनी यानागु खँ युनिभर्सल ल्याय्म्ह पुचःया अध्यक्ष विजयरत्न बज्राचार्यं कनादिल ।
वय्कलं प्रदर्शनपाखें वःगु दां समाजसेवाय् छ्यलेगु खँ नं कनादिल। ज्याझ्वलय् "माया" या निर्देशक, निर्माता व संकिपा क्यनेत आर्थिक ग्वाहालि याःपिं सकलें संघ संस्थायात नायः बज्राचार्यं हनापौ नं लःल्हानादीगु खःसा छ्यांज्ये गगनराज बज्राचार्यं खादां क्वखायेकादीगु खः ।
