रत्न विपश्यना विहार उलेज्या
येँ (सन्ध्या टाइम्स)/वंगु शनिवाः छगू तःजिगु ज्याझ्वःया दथुइ 'रत्न विपश्यना विहार' या उलेज्या जुल। सानो भर्याङ, चक्रपथ येँय् दयेकूगु थुगु विहार मरुत्वाःया हर्षरत्न ताम्राकार व वय्कःया परिवारं दान यानादीगु खः। भिक्षु अश्वघोष महास्थवीर, दाता हर्षरत्न ताम्राकार, सांसद भिक्षु आनन्द, कांग्रेस नेता तीर्थराम डंगोल व एमाले नेता अमृत बोहरापिंसं त्वाःदेवाय् मत च्याकाः उगु विहारया उलेज्या यानादीगु खः। विहारया उलेज्या व म्यानमारं बिज्याःम्ह सयादो ऊ सुजनप्पिय महास्थवीरं थुगु हे विहारय् वर्षावास सम्पन्न यानाबिज्याःगु लसताय् अन 'महान कथिन चीवर दान' व 'अष्ट परिकार दान' नं जूगु खः ।
उगु हे ज्याझ्वलय् गुलुपाः दाता जीवरत्न स्थापितपाखें श्रद्धेय भन्तेयात कलात्मक गुलुपाः नं लःल्हानादीगु खः। उगु गुलुपाः मलेसियाया पेनाङ्ग मेतानन्द विहारया निंतिं दान यानादीगु खः ।
