स्वंगू दलया सहलह निष्कर्ष विहीन
सेनापति प्रकरणया बारे निकास मालेत च्वंगु प्रमुख स्वंगू दलतय् बैठक निष्कर्ष विहीन जूगु दु ।
मंगलवाः च्वंगू स्वंगू प्रमुख दलत माओवादी, नेपाली कांग्रेस व एमालें थः थःगु हे अडान काःगुलिं सहलह निष्कर्ष विहीन जूगु खः । माओवादीं प्रधानसेनापतियात कारवाही यायेमा:गु व कांग्रेसं यायेमज्यूगु अडान काःगु खः ।
एमालें प्रधानसेनापति, रक्षामन्त्री व रोलक्रमया रथीयात चीकेमाःगु प्रस्ताव न्ह्यने तःगु खः । सेनापति प्रकरणय् विस्कं विस्कं विकल्पय् एमालें माओवादी व कांग्रेसनाप सहलह यासां नं निगूलिं दलं एमालेया प्रस्ताव अस्वीकार याःगु खः । कांग्रेस नेता रामचन्द्र पौडेलं माओवादी व एमालेया प्रस्तावय् सहमत जुइ मफुगु धयादिल । तर एमाले महासचिव ईश्वर पोखरेल धासा: थःगु प्रस्ताव अस्वीकार मजूगु धासें थप सहलह यायेगु निंतिं कन्हय् हाकनं बैठक सःतुगु खँ धयादिल ।
निकास मालेत एमालें बुधवाः सुथय् स्वंगू प्रमुख दलया बैठक सःतुगु खः ।
सेनापति प्रकरण सम्बन्धय् प्रधानमन्त्री पुष्पकमल दाहाल प्रचण्ड व नेपाली कांग्रेसया सभापति गिरिजाप्रसाद कोइराला दथुइ थौं सुथय् कोइराला निवासय् थ्वहे विषय् सहलह जूगु खः ।
