माओवादी-कांग्रेस वार्ता बिना निष्कर्ष क्वचाल
सत्तारुढ एकीकृत नेकपा (माओवादी) व प्रमुख विपक्षी दल नेपाली कांग्रेस दथुइ प्रधानसेनापति विवादया विषयलय् जूगु वार्ता बिना निष्कर्ष क्वचाःगु दु ।
कांग्रेस सभापति गिरिजाप्रसाद कोइरालाया निवास महाराजगंजय् निगू दल दथुइ जूगु वार्ताय् प्रधानमन्त्री पुष्पकमल दाहाल प्रचण्डं दलत दथुइ असमझदारी जुयाच्वंसाः देय्यात भिं मजुइगुलिं सेनापति विवादयात याकनं क्वचायेके माःगु खँ धयादिल । खँल्हाबंला लिपा प्रधानमन्त्री प्रचण्डं वार्ता सकारात्मक जूगु खँ धयादिसां नेपाली कांग्रेसया उपसभापति रामचन्द्र पौडेलं खँल्हाबंलाय् छुं सहमति मजूगु धयादिल । वयेकलं खँल्हाबंलाय् कांग्रेसं सनेपातियात कारवाही मयायेत इनाप यानादीगु खँ धयादिल ।
खँल्हाबंलाय् प्रधामन्त्री नापं माओवादीया अध्यक्ष प्रचण्ड, अर्थमन्त्री डा. बाबुराम भट्टराई, रक्षामन्त्री रामबहादुर थापा 'बादल' व माओवादी सचिवालय् दुजः नारायणकाजी श्रेष्ठ दुथ्याःगु खसाः नेपाली कांग्रेसया पाखें सभापति गिरिजाप्रसाद कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, रामसरण महत लगायत नेतातय्सं ब्वति काःगु खः ।
थौं हे कांग्रेस व एमाले दथुइ खँल्हाबंला जुइत्यंगु दुसाः प्रमुख स्वंगू दलत माओवादी एमाले व कांग्रेस दथुइ नं खँल्हाबंला जुइगु ज्याझ्व दु ।
