संसदीय नियमावली संशोधन यायेत च्यागू दलया प्रस्ताव
व्यवस्थापिका संसदय् दकलय् तःधंगु दल एनेकपा (माओवादी), सत्ता नेतृत्व यानाच्वंगु नेकपा (एमाले) सहित च्यागू दलं संसदया नियमावली संशोधन यानाः प्रधानमन्त्री निर्वाचनया न्हूगु प्रकृया सुरु यायेत संसद सचिवालय् प्रस्ताव दर्ता याःगु दु ।
च्यागू दलं सर्वोच्च अदालतं तकं न्हूगु प्रक्रियालय् वनेत सुझाव ब्यूगुलिं उकीया पालना यायेत नं नियमावली संशोधन यायेमाःगु खँ उगु प्रस्तावय् न्ह्यथनातःगु दु । च्यागूलिं दलया सचेतकतय्सं लःल्हाःचिं तायाः उगु प्रस्ताव दर्ता याःगु खः ।
माओवादी, एमाले नापं मधेशी जनअधिकार फोरम नेपाल, नेकपा (माले) समाजवादी, जनमुक्ति पार्टी, नेपाली जनता दल, नेपाल सद्भावना पार्टी (सरित गिरी) व नेपाः राष्ट्रिय पार्टीं उगु प्रस्ताव दर्ता याःगु खः ।
थ्वस्वयां न्ह्यः नेपाली कांग्रेसं सवोच्च अदालतं प्रधानमन्त्रीया याकः उम्मेदवार रामचन्द्र पौडेलयात निर्विरोध घोषणा यायेमाःगु आशय सहित फैसला न्यंकूगु धासें संसद पाखें पौडेलयात निर्विरोध यायेमाःगु धासें संसदय् प्रस्ताव दर्ता याःगु खः ।
