स्पष्टिकरण लोकतान्त्रिक विधि व नागरिक सर्वोच्चताया सम्मान : नागरिक समाज
प्रधानसेनापति रुक्मांग कटवाल नाप सरकारं काःगु स्पष्टिकरण लोकतान्त्रिक विधि व नागरिक सर्वोच्चताया सम्मान जूगु ठहर नागरिक समाजं याःगु दु ।
राइमाझी आयोगं दोषी ठहर याःम्ह, जननिर्वाचित सरकारया आदेश अवज्ञा याइम्ह, माओवादी लडाकूयात सेनाय् समायोजन यायेमज्यू धकाः शान्ति सम्झौताया मर्मय् प्रहार याइम्ह, सरकारनाप राजनीतिक नेताया थें व्यवहार याइम्ह प्रधानसेनापति रुक्मांग कटवालयात काःगु स्पष्टिकरण देशय् नागरिक सर्वोच्चता कायम यायेगु पलाः जूगु नागरिक समाजं सोमवाः जारी याःगु विज्ञप्ति न्ह्थंनातःगु दु ।
थौ येँय् छगू पत्रकार सम्मेलन मार्फत पितब्यूगु स्वंगू पृष्ठ तःहाकःगु प्रेस विज्ञप्ति माओवादी नेतृत्वया सरकारं लोकतान्त्रिक विधिया व्यवस्थाया यासें अपरिपक्व निर्णय याइगु व विरोध जुइसात लितकाइगु थंज्याःगु हाँस्यास्पद संस्कृति ब्वलंकाच्वंगु खँ नं न्ह्यथंनातःगु दु ।
थ्वस्वयां न्ह्यः नागरिक समाजया अगुवातय्सं राष्ट्रपति डा. रामवरण यादवनाप सहलह यानादीगु खः । सहलहया झ्वलय् देशय् खनेदयाच्वंगु राजनीतिक गतिरोधया बारे राष्ट्रपति यादवं प्वंकादीगु अभिव्यक्ति प्रति चिन्ता प्वंकूसें राष्ट्रपति यादवयात विवादय् फसेमजुइत नागरिग समाजं सुझाव ब्यूगु खः ।
