बजेट हयेत संविधान संशोधन
येँ (सन्ध्या टाइम्स)/अन्तरिम संविधान संशोधन यानाः वइगु मंसीर ३ गते संसदय् न्हूगु बजेट हयेगु खँय् संविधानसभाया मूमू स्वंगू राजनीतिक दल दथुइ सहमति जूगु दु ।
एकीकृत माओवादी, नेपाली कांग्रेस व एमालेया शीर्ष नेतात च्वनाः न्हूगु बजेट हयेगु निंतिं धकाः म्हिगः स्वंगू हे दलया पुलांपिं अर्थमन्त्रीत समेत दुथ्याःगु छगू पुचः दयेकूगु खःसा थौं सुथय् सिंहदरवारय् सभामुखया ज्याकुथी शीर्ष नेतात प्रचण्ड, झलनाथ खनाल व रामचन्द्र पौडेल दथुइ जूगु मुँज्याय् संविधान संशोधन यानाः बजेट हयेगु सहमति जूगु खः। बैठकय् बजेटया निंतिं दयेकूगु पुचःया दुजःत डा. बाबुराम भट्टराई, डा. रामशरण महत व भरतमोहन अधिकारी नं दुथ्याःगु खः ।
थौंया बैठकय् अन्तरिम संविधानया धारा ९६ संशोधन यायेगु खँय् स्वंगू दलया सहमति जूगु खः। आः धारा ९६ संशोधन यानाः 'सरकारं राजीनामा बिउगु निलाया दुने नं न्हूगु सरकार दयेके मफुत धाःसा कामचलाउ सरकारं हे बजेट हयेफइ' धइगु प्रावधान तइगु जूगु दु ।
अन्तरिम संविधानया धारा ९६ य् कामचलाउ सरकारं बाधा अड्काउ फुके यायेत पेश्की बजेट जक हये फइगु खँ न्ह्यथना तःगु दु। एकीकृत माओवादीं उकिं हे कामचलाउ सरकारं बजेट हये फइ मखु, उकिया नितिं संविधान संशोधन यायेमाः धकाः प्रस्ताव तःगु खः ।
