हैटीइ नेपाली शान्ति सेनायात आक्रमण
येँ (सन्ध्या टाइम्स)/हैजा ल्वय् न्यंका बिउगु धइगु द्वपं बियाः हैटीइ वनाच्वंपिं नेपाःया शान्ति सेनायात म्हिगः स्थानीय मनूतय्सं आक्रमण याःगु दु ।
हैटीइ स्ववाःया दुने हैजां जक द्वःछिम्ह मनू सीधुंकूगु दुसा मेपिं झिंछद्वः मनू प्रभावित जूगु दु। हैटीया निगूगु तःधंगु शहर क्याप हैटियनय् दंगा भड्के जूगु इलय् संयुक्त राष्ट्र संघीय सेनायात अप्पा, खाली सिसीं कयेका हःगु खःसा इमिसं पुरा शहर नापं ठप्प याना बिउगु खः ।
थःपिनि सुरक्षाया नितिं नेपाली सेना व हैटीया सुरक्षाकर्मीतय्सं अश्रुग्याँस तकं कयेकूगु खः। उगु ल्वापुइ लानाः झिंनिम्ह हैटीया नागरिक व ७ म्ह शान्ति सेना घाःपाः जूगु दु। प्रदर्शनकारीतय्सं वंगु अगस्टय् छम्ह ल्याय्म्ह सीगु घटनाय् नं नेपाली सेनायात हे द्वपं बियातःगु दु ।
