नेवाः राजनीतिक सम्मेलनया तयारी

येँ (सन्ध्या टाइम्स)/नेवाः स्वायत्त राज्य मंकाः संघर्ष समिति थ्वहे वइगु मंसिर १७ व १८ गते निन्हुयंकं यायेत्यंगु 'नेवाः राष्ट्रिय राजनीतिक सम्मेलन' या लागिं व्यापक रुपं तयारी न्ह्याकूगु दु ।

देय्न्यंकंया ६० गू जिल्लाया नेवाःतय्सं ब्वति काइगु उगु सम्मेलनया उलेज्या ख्वप जिल्लाय् जुइत्यंगु दु। ख्वपया लाय्कुली उलेज्या जुयाः मध्यपुर थिमि बोडे बन्द सत्र जुइगु सम्मेलन भव्यकथं ताःलाकेगु निंतिं मध्यपुर थिमि व ख्वपय् बृहत तयारी भेला च्वंगु दु ।

नेवाः स्वायत्त राज्य मंकाः संघर्ष समिति थिमि समन्वय समितिया ग्वसालय् च्वंगु बृहत भेलां सम्मेलनया व्यवस्थापनया निंतिं के.बी. घजुया संयोजकत्वय् ग्वाहालि समिति नीस्वंगु दुसा अथे द्यनेगु व्यवस्थापन यायेगु निंतिं नन्दकिशोर श्रेष्ठया संयोजकत्वय् ब्यवस्थापनया निंतिं तुल्सीराम दुवालया संयोजकत्वय् समिति नीस्वंगु दु। उकथं हे सांस्कृतिक ज्याझ्वःया नितिं नरगोविन्द श्रेष्ठया संयोजकत्वय् समिति नीस्वंगु दु
।
नेवाः स्वायत्त राज्य मंकाः संघर्ष समितिया नायः नरेन्द्रभक्त हाडा, समितिया सचिवालय समितिया कजि मल्ल के. सुन्दर व समितिया दुजः सुजीव बज्राचार्यया उपस्थितिइ थथे समितित नीस्वंगु खः ।

अथेहे म्हीग संघर्ष समितिया नायः व दुजःपिनि उपस्थितिइ संघर्ष समिति ख्वप समन्वय समितिया ग्वसालय् ख्वपय् नं बृहत तयारी भेला च्वन ।

उगु भेला ख्वपय् भव्यकथं राजनीतिक सम्मेलनया उलेज्या ख्वपया लाय्कुली यायेगु निंतिं त्रिरत्न शाक्यया संयोजक व उपसंयोजक सुनिल वासुया नेतृत्वय् सम्मेलन उलेज्या, सांस्कृतिक र्‍याली समिति नीस्वंगु दुसा उगु समिति थीथी जातीय संघ संस्थात दुजःकथं च्वंगु दु। नेवाः राष्ट्रिय राजनीतिक सम्मेलन भव्यकथं ताःलाकेगु नितिं थुकिया व्यापक तयारी संघर्ष समितिं यानाच्वंगु दुसा जिल्ला जिल्लां प्रतिनिधि छ्वया हयेगु नितिं पौ छ्वयेधुंकूगु दु ।

अथेहे सम्मेलनय् मंकाः नेवाः राजनीतिक अवधारणा दयेकेगु निंतिं नेवाः न्ह्यलुवा, माओवादी, कांग्रेस, एमाले, नेपाः पार्टीया नेवाः नेतात च्वनाः आवश्यक छलफलया ज्या न्ह्यानाच्वंगु दु ।