पद्मसुगन्ध विहारय् कथिन दान
येँ (सन्ध्या टाइम्स)/पद्म सगन्ध महा विहारय् (मजिपाटय्) थौं कथिन दान उत्सव न्यायेकूगु खः। उगु हे विहारय् महा स्थविर भन्ते सुमेध धीर सुधिरो वर्षावास च्वनाबिज्याःगु लसताय् उगु उत्सव जूगु खः। कथिन चीवर लुलक्षण किर्ति महाविहारया मिसा पुचःपाखें भिक्षु संघयात, अखिल भिक्षु महासंघया नायः महास्थविर अश्वघोष भन्तें लःल्हानादीगु खः ।
उम्ह श्रद्धेय भन्ते सुमेध धीर सुधिरो वंगु गुरु पुन्हिकुन्हुनिसें कतिं पुन्हितक स्वलायंक वर्षावास च्वनाबिज्याइगु खः। वसपोल उगु हे विहारय् वर्षावास च्वनाबिज्याःगु स्वदँ दुगु खँ विहारया प्रतिनिधिं जानकारी बियादीगु खः ।
कथिन दानया ज्याझ्वः क्वचायेकाः उपासक उपासिकापिन्सं भन्तेपिंत अष्ट परिकार नापं मेमेगु वस्तु व ध्यवा नं दान याःगु खः ।
उगु हे ज्याझ्वलय् श्रद्धेय भन्ते सुमेधं च्वयाबिज्याःगु "योग्यताया कदरबुछ" नांगु सफूया उलेज्या नं जूगु खः। ज्याझ्वलय् ८० म्ह भन्ते व गुरुमांपिंनापं आपालं उपासक उपासिकापिनिगु उपस्थिति दुगु खः ।
