नारावाजी लिपाः व्यवस्थापिका संसदया बैठक अवरुद्ध
प्रमुख प्रतिपक्षी दल नेपाली कांग्रेसया सभासदतय्सं संसदय् नारावाजी यायेवं संसंद बुधवाः तकया निंतिं स्थगित जूगु दु ।
सोमवाः न्हिनय् च्वंगु बैठकय् नं सेनापतिया बिषययात कयाः प्रतिपक्षी दल कांग्रेसं नारावाजी याःगु खः । सरकारं प्रधानसेनापति याके काःगु स्पष्टिकरण लितः कायेमाःगु माग यासें कांग्रेस सभासदतय्सं संसद चले यायेमबीगु निर्णय याःगु खः । संसंदय् सेनापतिया स्पष्टिकरण लित कायेत नारावाजी यानाच्वंगु ईलय् माओवादीया नेतातय्सं संसद अवरुद्ध याये मदु धकाः नारावाजी याःगु खः ।
बैठकया न्ह्यायेवं माओवादी सभासद सालिकराम जममट्टेलं सेनायात बचे यायेत स्वःगु कांग्रेसनाप आः न्हूगु लडाई न्ह्याइगु ख्याच्वः बियादिल । वयेकलं आःया लडाई सेना नाप स्वयां नं प्रतिपक्षी कांग्रेस नाप जूगु धयादिल । एमालें बहनि छगू व न्हिनय् छगू निर्णय याइगु द्वपं बियादिसें सेनापतिया खँय् स्पष्ट जुइत इनाप यानादिल ।
अथेहे कांग्रेस उपसभापति प्रकाशमान सिंह देशय् संक्रमणकालीन ईलय् सरकारं प्रधानसेनापतिया कारवाही यानाः माओवादीं सत्ता कब्जा यायेत स्वःगु द्वपं बियादिल । अथेहे वयेकलं झिंन्ह्यगू दलं सरकारं काःगु स्पष्टिकरण लितः मकाःतल्ले संसद अवरुद्ध यायेगु निर्णय याःगु जानकारी बिवं कांग्रेसया सभासदतय्सं नारावाजी याःगु खः । नारावाजी जुइवं सभामुखं थौंया बैठक बुधवाः तकया निंतिं स्थिगित याःगु खः ।
